殷千葉 Sophia
平時得閒嘅時候我自己都會彈下鋼琴，放鬆一下，俾自己嘅心靈都有啲休息嘅空間～你哋估唔估得到我而家彈緊嘅呢首鋼琴曲係咩嚟㗎呢？
健身係我最近最鍾意嘅活動之一，我好感恩溫哥華呢座城市令我愛上運動～以前做cardio三十分鐘都要靠朱古力補充體力嘅我，而家已經可以喺樓梯機上輕輕鬆鬆完成。雖然我做嘅器械重量唔算重， 但每一下我已經用晒全身嘅力氣啦。感恩運動呢個習慣令我變得更加有精力去迎接每一個忙碌嘅日子。
書法一直都係展現一個人內在性格嘅藝術， 亦陪伴咗我好多年。 我好感激屋企人喺我細個嗰陣對我書寫工整度嘅嚴格要求， 令我學識咗專注同耐性。 而家天氣開始轉涼， 我寫咗 "安康" 兩個字送比大家， 希望每一位都注意保暖，身體健康，事事順心～
做主播一直係我最大嘅夢想，我希望可以用自己嘅聲音去傳遞力量，聆聽不同人群嘅聲音，令到觀眾可以睇到一個更加真實更加全面嘅世界。同時我都係一個鍾意動態工作嘅人， 享受喺不同環境中學習同埋交流， 呢份活力亦都令我對傳媒行業充滿熱情。
住喺溫哥華 hiking梗係少不了啦！ 印象最深刻嘅一定係西溫嘅 Tunnel Bluff 同北溫嘅 Grouse Grind。 前者我行咗大概四個鐘 挑戰12公里往返，後者雖然得3公里左右 但全程幾乎都係樓梯，真係天然嘅step master！我用咗1小時40分鐘登頂，一路上風景變化莫測 對體能都係好大嘅考驗。不過只要咬緊牙關堅持到最後嘅話，山頂風景真係值得。希望下次可以挑戰難度再高啲嘅hiking路線！
我非常鍾意旅行，品嘗不同地方嘅美食，因為我覺得呢個係一種可以令到我身心放鬆嘅方式，亦都可以同呢個世界產生連結，體驗每個地方不同嘅人文，感受佢哋嘅生活方式，令到自己嘅眼界更加開闊。
我亦都非常鍾意大海，因為總可以令到我嘅內心感受到平靜同自由。每次壓力好大嗰陣，喺海邊聽住海浪聲，都會令我覺得特別治癒，同時重新搵返內心嘅力量。
我八歲嗰陣參加咗校園嘅小主持比賽，當時好幸運被一位國內大型節目嘅導演發掘，成為節目入面嘅女一號。嗰一次上鏡嘅經歷，令我第一次真真正正感受到幕前工作嘅魅力，亦都種下咗我成為主持人嘅夢想。不過我明白，光鮮嘅背後唔係偶然，而係日積月累嘅努力同堅持。今年我決定參選溫哥華華裔小姐，就係希望可以離我細個嘅夢想再行近一步，將我喺舞台上嘅光芒，分享俾更多觀眾。
喺大學時期，因為對粵語嘅熱愛，我修讀晒UBC嘅粵語課程，仲有幸擔任CNTO 311嘅助教。呢段經歷唔單止加深咗我對香港本地文化同語言嘅理解，亦令我結識咗一班好老師同好朋友。作為一個非母語者，我好開心可以透過自己嘅學習經驗，鼓勵更多人接觸同欣賞粵語文化。希望自己嘅分享，能夠令更多人感受到粵語之美，傳承呢一份珍貴嘅語言同文化。
睇博物館係我其中一個最鍾意嘅活動。每次企喺每一幅作品之前，都好似可以同創作者進行一次跨越時空嘅心靈對話。透過作品，我會細細體會佢哋當時嘅心境，感受筆觸之間嘅情感力度，欣賞背後思維嘅深度。對我嚟講，睇展覽唔止係學習歷史或藝術，仲係一場沉澱心靈嘅修行。
